សិក្ខាសាលាផ្សព្វផ្សាយ “សេចក្តីណែនាំស្តីពីកិច្ចពិគ្រោះយោបល់ភាពជាដៃគូនៅថ្នាក់ក្រោមជាតិ”

ខេត្តសៀមរាប៖ នៅព្រឹកថ្ងៃ​ទី​០៧​ ខែសីហា​ ឆ្នាំ​២០១៩​ លោក​ជំទាវ​ សុិន​ ណម​ សមាជិកា​ ក្រុមប្រឹក្សា​ខេត្ត​ តំណាង​ឯកឧត្តម​ អុឹង​ ហឿន​ ប្រធានក្រុម​ប្រឹក្សា​ខេត្ត​ លោក​ ពៅ​ ពិសិដ្ឋ​ អភិបាលរង​ នៃគណៈអភិបាលខេត្ត​ និងជាតំណាងដ៏ខ្ពង់ខ្ពស់​ ឯកឧត្តម​ ទៀ​ សីហា​ អភិបាល​ នៃគណៈអភិបាលខេត្ត​សៀមរាប​ បានចូលរួម​សិក្ខាសាលា​ផ្សព្វផ្សាយ​ "សេចក្ដីណែនាំ​ស្ដីពី​កិច្ចពិគ្រោះយោបល់ភាពជា​ដៃគូរនៅថ្នាក់ក្រោមជាតិ"​ ក្រោមអធិបតីភាព​ ឯកឧត្តម​ អ៊ឹម​ សួរ​ អគ្គលេខាធិការ​រងគណៈកម្មាធិការនីតិសម្បទា​ និងអភិវឌ្ឍន៍កម្ពុជា​ នៃក្រុមប្រឹក្សាអភិវឌ្ឍន៍កម្ពុជា​ ឯកឧត្តម​ ហ៊ូ​ តាំងអេង​ រដ្ឋលេខាធិការ​ ក្រសួង​ផែនការ​ លោក​ ជ័យ​ សម្បត្តិ​ ប្រធានអង្គភាពវិភាគ​ និងអភិវឌ្ឍន៍គោលនយោបាយ​ នៃលេខាធិការដ្ឋាន​ គ.ជ.អ.ប​ និងមានការចូលរួមពី​ ឯកឧត្តម​ លោកជំទាវ​ លោក​ លោកស្រី​ តំណាង​មន្ទីរ​-អង្គភាព​ មកពីខេត្តចំនួន​៤​ គឺខេត្តសៀមរាប​ ឧត្តរមានជ័យ​ ព្រះវិហារ​ និងខេត្តកំពង់ធំ​ សរុបចំនួន​ ៦០នាក់​។

គោលដៅសំខាន់នៃសិក្ខាសាលានេះ គឺការផ្សព្វ​ផ្សាយសេចក្តីសម្រេចរបស់រាជរដ្ឋាភិបាលស្តីពី សេចក្តីណែនាំក្នុងការរៀបចំកិច្ចពិគ្រោះយោបល់ភាពជាដៃគូនៅថ្នាក់ក្រោមជាតិ​ហេីយសិក្ខាសាលានឹងផ្តោតលើរបៀបវារៈសំខាន់ចំនួន ០៤ រួមមាន៖
១ -ការកសាងផែនការអភិវឌ្ឍន៍​ និងកម្មវិធីវិនិយោគបីឆ្នាំរំកិល ។​
២-សេចក្តីណែនាំស្តីពីកិច្ចពិគ្រោះយោបល់ភាពជាដៃគូនៅថ្នាក់ក្រោមជាតិ ។
៣-បទបង្ហាញស្តីពីប្រព័ន្ធទិន្នន័យហិរញ្ញប្បទានសហប្រតិបត្តិការ និងប្រព័ន្ធទិន្នន័យស្តីពីអង្គការមិនមែនរដ្ឋាភិបាល។ 
៤-បទបង្ហាញផ្តោតលើការពិភាក្សាពីការធ្វើសមាហរណកម្មយន្តការ ។

គោលបំណងនៃកិច្ចពិគ្រោះយោបល់ភាពជាដៃគូនៅថ្នាក់ក្រោមជាតិគឺ ៖
១-លើកកម្ពស់អភិក្រមនៃការចូលរួមប្រកបដោយបរិយាប័ន្ន ដើម្បីពិនិត្យវឌ្ឍនភាពការអភិវឌ្ឍ និងបញ្ហាប្រឈមនៅមូលដ្ឋាន
២-ពង្រឹងសមត្ថភាពគ្រប់គ្រងរបស់រដ្ឋបាលថ្នាក់ក្រោមជាតិ
៣-ពង្រឹងគុណភាព និងប្រសិទ្ធភាពនៃការផ្ដល់សេវា​សាធារណៈនៅថ្នាក់ក្រោមជាតិ
៤-ចែករំលែកព័ត៌មានរវាងតួអង្គអភិវឌ្ឍន៍​ទាំងអស់ដែលបានផ្តល់ការគាំទ្រ ឬអនុវត្តសកម្មភាពនៅថ្នាក់ក្រោមជាតិ
៥-សំខាន់ គឺបំពេញបន្ថែមឲ្យយន្តការដទៃទៀត និងវេទិកាពិគ្រោះយោបល់ថ្នាក់ក្រោមជាតិដែលមានស្រាប់ ។

សិក្ខាសាលានេះនឹងផ្តល់នូវមូលដ្ឋាន និងកាលានុវត្តភាព​ សម្រាប់ការរៀបចំកិច្ចពិគ្រោះយោបល់ភាពជាដៃគូនៅថ្នាក់ក្រោមជាតិនាពេលខាងមុខ៕