នេះជាប្រសាសន៍របស់ ឯកឧត្តម ឌុច សុវណ្ណារី រដ្ឋលេខាធិការនៃក្រសួងទំនាក់ទំនងជាមួយរដ្ឋសភាព្រឹទ្ធសភា និងអធិការកិច្ច ដែលបានលើកឡើងនៅ ក្នុងការចុះមកធ្វើអធិកានៅខេត្តកណ្តាល កាលពីព្រឹកថ្ងៃទី២៣ ខែធ្នូ ឆ្នាំ២០១៩។ ឯកឧត្តមបន្តថា បន្ទាប់ពីបញ្ចប់ការងារក្នុងការចុះធ្វើអធិការកិច្ចរួច ស្ថាប័នទាំងអស់ នឹងទទួលបាននូវបទពិសោធន៍ថ្មីៗក្នុងការកែលម្អស្ថាប័ន ធ្វើឲ្យការងារកាន់តែមានប្រសិទ្ធភាព ស្ថាប័នកាន់តែរឹងមាំ ជាពិសេសនឹងចូលរួមកាត់បន្ថយ ហើយឈានទៅលុបបំបាត់បានទាំងស្រុង នូវរាល់កំហុសផ្សេងៗក្នុងការអនុវត្តការងារនៅពេលក្រោយទៀតផងដែរ។
ជាការឆ្លើយតប ឯកឧត្តមបណ្ឌិត ម៉ៅ ភិរុណ អភិបាលនៃគណៈអភិបាលខេត្តកណ្ដាល ថ្លែងនូវការគាំទ្រ និងយល់ព្រមសហការយ៉ាងពេញទំហឹងជាមួយគណៈប្រតិភូ នៃក្រុមការងារចុះធ្វើអធិការកិច្ចរបស់ក្រសួង ដោយឯកឧត្តមបានលើកឡើងថា ជាធម្មតានៅក្នុងស្ថាប័ន ឬ តាមផ្នែកជំនាញនីមួយៗតែងតែមានកំហុសជៀសមិនផុតឡើយ នៅក្នុងការអនុវត្តការងាររបស់ខ្លួន។
ឯកឧត្តមបានបញ្ជាក់ថា ចំណុចខ្វះខាត ឬ កំហុសឆ្គងទាំងអស់នោះហើយដែលយើងទាំងអស់គ្នាត្រូវតែរួមគ្នាធ្វើការស្រាវជ្រាវរកអោយឃើញ ដើម្បីចាត់វិធានការកែលម្អឡើងវិញជាបន្ទាន់ ដើម្បីធ្វើឲ្យការងារនោះដំណើរការបានកាន់តែល្អ បញ្ជៀសនូវវិបត្តិ និងទំនាស់ផ្សេងៗ នៅក្នុងស្ថាប័ន ដើម្បីធ្វើឲ្យស្ថាប័ន មន្ទីរ អង្គភាព រដ្ឋបាលខេត្ត ក្រុង ស្រុក កាន់តែមានសមត្ថភាពខ្លាំងក្លារឹងមាំ ក្នុងការបម្រើផលប្រយោជន៍ប្រជាជន និងអភិវឌ្ឍប្រទេសជាតិ ដែលជាបំណងប្រាថ្នា របស់រាជរដ្ឋាភិបាល ។
សូមជម្រាបផងដែរថា ក្នុងការចុះធ្វើអធិការកិច្ចនេះក្រុមការងារបានធ្វើអធិការកិច្ចលើការងារគ្រប់គ្រងរដ្ឋបាល ការងារគ្រប់គ្រងហិរញ្ញវត្ថុ ការងារគ្រប់គ្រងទ្រព្យសម្បត្តិរដ្ឋ ក្នុងកាលបរិច្ឆេតឆ្នាំ២០១៨ និងបណ្ដាឆ្នាំពាក់ព័ន្ធ នៅគ្រប់ស្ថាប័ន មន្ទីរ អង្គភាពទូទៅក្នុងខេត្តកណ្ដាល៕
No comments:
Post a Comment