ឯកឧត្តម សុខ លូ អញ្ជើញជាអធិបតីក្នុងពិធីទិវា​អន្តរជាតិនៃអ្នក​ស្ម័គ្រចិត្ត ក្រោមប្រធានបទ "ស្ម័គ្រចិត្តដើម្បីអនាគតប្រកប​ដោយ​បរិយាបន្ន"

ខេត្តកំពង់ធំ៖ ឯកឧត្តម សុខ លូ ប្រធានគណៈកម្មាធិការសាខាកាកបាទក្រហម​កម្ពុជាខេត្តកំពង់ធំ អញ្ជើញជាអធិបតីក្នុងពិធីទិវាអន្តរជាតិ​នៃអ្នកស្ម័គ្រចិត្ត ក្រោមប្រធានបទ"ស្ម័គ្រចិត្តដើម្បីអនាគតប្រកប​ដោយបរិយាបន្ន" នៅអនុសាខាកាកបាទក្រហមកម្ពុជា​ស្រុក​បារាយណ៍ ដោយមានការអញ្ជើញចូលរួមពី គណៈកម្មាធិអនុ​សាខា​កក្រក ស្រុកបារាយណ៍ និងស្រុកតាំងគោក អ្នកស្ម័គ្រចិត្ត និងយុវជនកាកបាទក្រហម ទាំង៦សាលា នៃស្រុកបារាយណ៍ និងស្រុកតាំងគោក សរុបប្រមាណជាង ៥០០នាក់ នាព្រឹកថ្ងៃទី២៤ ខែធ្នូ ឆ្នាំ២០១៩។

នាក្នុងឱកាសនោះ ឯកឧត្តម សុខ លូ បានផ្តាំផ្ញើសាកសួរសុខ​ទុក្ខពី​សម្ដេចគតិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទ​ក្រហមកម្ពុជា ជូនចំពោះសមាជិក សមាជិកាទាំងអស់ ពិសេសអ្នក​ស្ម័គ្រចិត្ត និងយុវជនកាកបាទក្រហមកម្ពុជា ដែលជាកម្លាំងស្នូល និងជាធនធានមនុស្សដ៏មានសារៈសំខាន់ ក្នុងការរួមចំណែកជួយ​ដល់ជនរងគ្រោះ ជនងាយរងគ្រោះបំផុត នៅក្នុងសហគមន៍ និងនៅតាមគ្រឹះស្ថានសិក្សានានា ហើយសូមបន្តចូលរួមក្នុង​ការងារមនុស្សធម៌នេះឲ្យបានកាន់តែល្អប្រសើរឡើង ប្រកបដោយប្រសិទ្ធភាពថែមទៀត។

ឯកឧត្តមបន្ថែមទៀតថា ទិវាអន្តរជាតិនៃអ្នកស្ម័គ្រចិត្ត គឺជាឱកាសដ៏ពិសេសមួយ ដើម្បីសម្តែងនូវការដឹងគុណ និងកិច្ចខិតខំប្រឹងប្រែង ទាំងកម្លាំងកាយចិត្ត ប្រាជ្ញា ស្មារតី និងពេលវេលា របស់អ្នកស្ម័គ្រចិត្ត ដើម្បីសកម្មភាពមនុស្សធម៌ ដែលជាផ្នែកមួយនៃការសម្រាលទុក្ខលំបាក និងកាត់បន្ថយភាព​ក្រីក្ររបស់ប្រជាជនរងគ្រោះ ងាយរងគ្រោះ ផ្សេងៗ នៅក្នុងសហគមន៍ និងទីកន្លែងនានា តាមលទ្ធភាពដែល​អ្នកស្ម័គ្រចិត្តយើងអាចធ្វើទៅបាន។

លើសពីនេះទៀត ឯកឧត្តម សុខ លូ បានផ្តាំផ្ញើរដល់សមាជិក សមាជិកា និងយុវជនស្ម័គ្រចិត្តកាកបាទក្រហមទាំងអស់ សូមខិតខបន្តផ្សព្វផ្សាយឲ្យបានទូលំទូលាយអំពីគោលការណ៍ទាំង៧ចំណុច របស់កាកបាទក្រហមកម្ពុជា នៅតាមមូលដ្ឋាន ក៏ដូចជាគ្រឹះស្ថាននានាជាដើម។ ឯកឧត្តមផ្តាំផ្ញើដល់ក្មួយៗ អោយចូលរួមគោរពច្បាប់ចរាចរណ៍ ជិះម៉ូតពាក់មួកសុវត្ថិភាព បើកបររថយន្តត្រូវពាក់ខ្សែរក្រវ៉ាត់ ទាំងអ្នកបើកបរ និងអ្នករួមដំណើរ ព្រោះគ្រោះថ្នាក់ចរាចរណ៍នេះ បានបន្សល់ទុកនូវស្ត្រីមេម៉ាយ ជនពិការ ក្មេងកំព្រា ជាច្រើនរូប៕